இரு கைகளாலும் 500 கிலோ எடையைத் தூக்கும் திறனுடன், சுமார் 13 அடி உயர மனித வடிவ ரோபோவை சீனாவின் நியோட்ரா டைனமிக்ஸ் நிறுவனம் காட்சிப்படுத்தியுள்ளது. ஆபத்தான தொழிற்சாலைப் பணிகளில் மனிதர்களின் சுமையைக் குறைப்பதே இதன் நோக்கம்.
‘நியோ1’ என்ற இந்த ரோபோ, 2026 சீன சர்வதேச தொழில் கண்காட்சியில் ஜேடி இண்டஸ்ட்ரியல் நிறுவனத்துடன் இணைந்து காட்சிப்படுத்தப்பட்டது. சுமார் நான்கு மீட்டர் உயரமும், 1.2 டன் எடையும் கொண்டதாக நிறுவனம் தெரிவித்துள்ளது.இதன் உடலில் 41 இயக்க நிலைகள் உள்ளன. அவற்றில் 39 இயக்கங்கள் ஹைட்ராலிக் எனப்படும் திரவ அழுத்தத் தொழில்நுட்பத்திலும், முன்கைகளின் இரண்டு சுழற்சி இயக்கங்கள் மின்சாரத்திலும் செயல்படுகின்றன. அதிக விசையையும் துல்லியமான அசைவுகளையும் ஒருங்கிணைப்பதே இந்த கலப்புத் தொழில்நுட்பத்தின் சிறப்பு என்று நிறுவனம் கூறுகிறது.
கனரக உதிரிபாகங்களைப் பொருத்துதல், துறைமுகங்களில் சரக்குகளைக் கையாளுதல், சுரங்கப் பணிகள், அணுமின் நிலையப் பராமரிப்பு, ஆழ்கடல் சாதனப் பராமரிப்பு மற்றும் பேரிடர் மீட்பு ஆகியவை இதற்கான இலக்குப் பயன்பாடுகள். குறிப்பாக, மனிதர்கள் நுழைவதில் ஆபத்துள்ள இடங்களில் பயன்படுத்தத் திட்டமிடப்பட்டுள்ளது.
மனித உருவத்தைப் பின்பற்றுவதோடு நின்றுவிடாமல், மனித உடல் வலிமையின் வரம்புகளைக் கடக்கும் இயந்திரங்களை உருவாக்க வேண்டும் என்பதே தங்கள் அணுகுமுறை என நிறுவன நிறுவனர் யாங் தாவ் தெரிவித்துள்ளார். கண்காட்சிக் கவர்ச்சியைத் தாண்டி, தொடர்ச்சியான தொழிற்சாலைப் பணிகளில் இது எப்படிச் செயல்படும் என்பதே அடுத்த முக்கிய சோதனையாக இருக்கும்.
